जितं जितं तेऽजित ! यज्ञभावन !
त्रयीं तनुं स्वां परिधुन्वते नमः ।
यद्रोमगर्तेषु निलिल्युरध्वरा-
स्तस्मै नमः कारणसूकराय ते ॥ १ ॥

jitaṃ jitaṃ te’jita ! yajñabhāvana !
trayīṃ tanuṃ svāṃ paridhunvate namaḥ ;
yadromagarteṣu nililyuradhvarā-
stasmai namaḥ kāraṇasūkarāya te . 1 .

रूपं तवैतन्ननु दुष्कृतात्मनां
दुर्दर्शनं देव ! यदध्वरात्मकम् ।
छन्दांसि यस्य त्वचि बर्हिरोम-
स्वाज्यं दृशि त्वङ्घ्रिषु चातुर्होत्रम् ॥ २ ॥

rūpaṃ tavaitannanu duṣkṛtātmanāṃ
durdarśanaṃ deva ! yadadhvarātmakam ;
chandāṃsi yasya tvaci barhiroma-
svājyaṃ dṛśi tvaṅghriṣu cāturhotram . 2 .

स्रुक् तुण्ड आसीत् स्रुव ईश ! नासयो-
रिडोदरे चमसाः कर्णरन्ध्रे ।
प्राशित्रमास्ये ग्रसने ग्रहास्तु ते
यच्चर्वणं ते भगवन्नग्निहोत्रम् ॥ ३ ॥

sruk tuṇḍa āsīt sruva īśa ! nāsayo-
riḍodare camasāḥ karṇarandhre ;
prāśitramāsye grasane grahāstu te
yaccarvaṇaṃ te bhagavannagnihotram . 3 .

दीक्षानुजन्मोपसदः शिरोधरं
त्वं प्रायणीयोदयनीयदंष्ट्रः ।
जिह्वा प्रवर्ग्यस्तव शीर्षकं क्रतोः
सभ्यावसथ्यं चितयोऽसवो हि ते ॥ ४ ॥

dīkṣānujanmopasadaḥ śirodharaṃ
tvaṃ prāyaṇīyodayanīyadaṃṣṭraḥ ;
jihvā pravargyastava śīrṣakaṃ kratoḥ
sabhyāvasathyaṃ citayo’savo hi te . 4 .

सोमस्तु रेतः सवनान्यवस्थितिः
संस्थाविभेदास्तव देव ! धातवः ।
सत्राणि सर्वाणि शरीरसन्धि-
स्त्वं सर्वयज्ञक्रतुरिष्टिबन्धनः ॥ ५ ॥

somastu retaḥ savanānyavasthitiḥ
saṃsthāvibhedāstava deva ! dhātavaḥ ;
satrāṇi sarvāṇi śarīrasandhi-
stvaṃ sarvayajñakraturiṣṭibandhanaḥ . 5 .

नमो नमस्तेऽखिलमन्त्रदेवता-
द्रव्याय सर्वक्रतवे क्रियात्मने ।
वैराग्यभक्त्यात्मजयानुभावित-
ज्ञानाय विद्यागुरवे नमो नमः ॥ ६ ॥

namo namaste’khilamantradevatā-
dravyāya sarvakratave kriyātmane ;
vairāgyabhaktyātmajayānubhāvita-
jñānāya vidyāgurave namo namaḥ . 6 .

दंष्ट्राग्रकोट्या भगवंस्त्वया धृता
विराजते भूधर ! भूः सभूधरा ।
यथा वनान्निःसरतो दता धृता
मतङ्गजेन्द्रस्य सपत्रपद्मिनी ॥ ७ ॥

daṃṣṭrāgrakoṭyā bhagavaṃstvayā dhṛtā
virājate bhūdhara ! bhūḥ sabhūdharā ;
yathā vanānniḥsarato datā dhṛtā
mataṅgajendrasya sapatrapadminī . 7 .

त्रयीमयं रूपमिदं च सौकरं
भूमण्डलेनाथ दता धृतेन ते ।
चकास्ति शृङ्गोढघनेन भूयसा
कुलाचलेन्द्रस्य यथैव विभ्रमः ॥ ८ ॥

trayīmayaṃ rūpamidaṃ ca saukaraṃ
bhūmaṇḍalenātha datā dhṛtena te ;
cakāsti śṛṅgoḍhaghanena bhūyasā
kulācalendrasya yathaiva vibhramaḥ . 8 .

संस्थापयैनां जगतां सतस्थुषां
लोकाय पत्नीमसि मातरं पिता ।
विधेम चास्यै नमसा सह त्वया
यस्यां स्वतेजोऽग्निमिवारणावधाः ॥ ९ ॥

saṃsthāpayaināṃ jagatāṃ satasthuṣāṃ
lokāya patnīmasi mātaraṃ pitā ;
vidhema cāsyai namasā saha tvayā
yasyāṃ svatejo’gnimivāraṇāvadhāḥ . 9 .

कः श्रद्दधीतान्यतमस्तव प्रभो !
रसां गताया भुव उद्विबर्हणम् ।
न विस्मयोऽसौ त्वयि विश्वविस्मये
यो माययेदं ससृजेऽतिविस्मयम् ॥ १० ॥

kaḥ śraddadhītānyatamastava prabho !
rasāṃ gatāyā bhuva udvibarhaṇam ;
na vismayo’sau tvayi viśvavismaye
yo māyayedaṃ sasṛje’tivismayam . 10 .

विधुन्वता वेदमयं निजं वपु-
र्जनस्तपस्सत्यनिवासिनो वयम् ।
सटाशिखोद्धूतशिवाम्बुबिन्दुभि-
र्विमृज्यमाना भृशमीश ! पाविताः ॥ ११ ॥

vidhunvatā vedamayaṃ nijaṃ vapu-
rjanastapassatyanivāsino vayam ;
saṭāśikhoddhūtaśivāmbubindubhi-
rvimṛjyamānā bhṛśamīśa ! pāvitāḥ . 11 .

स वै बत भ्रष्टमतिस्तवैष ते
यः कर्मणां पारमपारकर्मणः ।
यद्योगमायागुणयोगमोहितं
विश्वं समस्तं भगवन् ! विधेहि शम् ॥१२ ॥

sa vai bata bhraṣṭamatistavaiṣa te
yaḥ karmaṇāṃ pāramapārakarmaṇaḥ ;
yadyogamāyāguṇayogamohitaṃ
viśvaṃ samastaṃ bhagavan ! vidhehi śam .12 .