कृपापारावारां तपनतनयां तापशमनीं
मुरारिप्रेयस्यां भवभयदवां भक्तवरदाम् ।
विपज्जालोन्मुक्तां श्रियमपि सुखाप्तेः प्रददतीं
सदा धीरो नूनं भजति यमुनां नित्यफलदाम् ॥ १ ॥

kṛpāpārāvārāṃ tapanatanayāṃ tāpaśamanīṃ
murāripreyasyāṃ bhavabhayadavāṃ bhaktavaradām ;
vipajjālonmuktāṃ śriyamapi sukhāpteḥ pradadatīṃ
sadā dhīro nūnaṃ bhajati yamunāṃ nityaphaladām . 1 .

मधुवनचारिणि भास्करवाहिनि जाह्नविसङ्गिनि सिन्धुसुते
मधुरिपुभूषणि माधवतोषिणि गोकुलभीतिविनाशकृते ।
जगदघमोचिनि मानसदायिनि केशवकेलिनिदानगते
जय यमुने जय भीतिनिवारिणि सङ्कटनाशिनि पावय माम् ॥२॥

madhuvanacāriṇi bhāskaravāhini jāhnavisaṅgini sindhusute
madhuripubhūṣaṇi mādhavatoṣiṇi gokulabhītivināśakṛte ;
jagadaghamocini mānasadāyini keśavakelinidānagate
jaya yamune jaya bhītinivāriṇi saṅkaṭanāśini pāvaya mām .2.

अयि मधुरे मधुमोदविलासिनि शैलविदारिणि वेगपरे
परिजनपालिनि दुष्टनिषूदिनि वाञ्छितकामविलासधरे ।
व्रजपुरवासिजनार्जितपातकहारिणि विश्वजनोद्धरिके
जय यमुने जय भीतिनिवारिणि सङ्कटनाशिनि पावय माम् ॥३॥

ayi madhure madhumodavilāsini śailavidāriṇi vegapare
parijanapālini duṣṭaniṣūdini vāñchitakāmavilāsadhare ;
vrajapuravāsijanārjitapātakahāriṇi viśvajanoddharike
jaya yamune jaya bhītinivāriṇi saṅkaṭanāśini pāvaya mām .3.

अतिविपदम्बुधिमग्नजनं भवतापशताकुलमानसकं
गतिमतिहीनमशेषभयाकुलमागतपादसरोजयुगम् ।
ऋणभयभीतिमनिष्कृतिपातककोटिशतायुतपुञ्जतरं
जय यमुने जय भीतिनिवारिणि सङ्कटनाशिनि पावय माम् ॥४॥

ativipadambudhimagnajanaṃ bhavatāpaśatākulamānasakaṃ
gatimatihīnamaśeṣabhayākulamāgatapādasarojayugam ;
ṛṇabhayabhītimaniṣkṛtipātakakoṭiśatāyutapuñjataraṃ
jaya yamune jaya bhītinivāriṇi saṅkaṭanāśini pāvaya mām .4.

नवजलदद्युतिकोटिलसत्तनुहेममयाभररञ्जितके
तडिदवहेलिपदाञ्चलचञ्चलशोभितपीतसुचेलधरे ।
मणिमयभूषणचित्रपटासनरञ्जितगञ्जितभानुकरे
जय यमुने जय भीतिनिवारिणि सङ्कटनाशिनि पावय माम् ॥५॥

navajaladadyutikoṭilasattanuhemamayābhararañjitake
taḍidavahelipadāñcalacañcalaśobhitapītasuceladhare ;
maṇimayabhūṣaṇacitrapaṭāsanarañjitagañjitabhānukare
jaya yamune jaya bhītinivāriṇi saṅkaṭanāśini pāvaya mām .5.

शुभपुलिने मधुमत्तयदूद्भवरासमहोत्सवकेलिभरे
उच्चकुलाचलराजितमैक्तिकहारमयाभररोदसिके ।
नवमणिकोटिकभास्करकञ्चुकशोभिततारकहारयुते
जय यमुने जय भीतिनिवारिणि सङ्कटनाशिनि पावय माम् ॥६॥

śubhapuline madhumattayadūdbhavarāsamahotsavakelibhare
uccakulācalarājitamaiktikahāramayābhararodasike ;
navamaṇikoṭikabhāskarakañcukaśobhitatārakahārayute
jaya yamune jaya bhītinivāriṇi saṅkaṭanāśini pāvaya mām .6.

करिवरमौक्तिकनासिकभूषणवातचमत्कृतचञ्चलके
मुखकमलामलसौरभचञ्चलमत्तमधुव्रतलोचनिके ।
मणिगणकुण्डललोलपरिस्फुरदाकुलगण्डयुगामलके
जय यमुने जय भीतिनिवारिणि सङ्कटनाशिनि पावय माम् ॥७॥

karivaramauktikanāsikabhūṣaṇavātacamatkṛtacañcalake
mukhakamalāmalasaurabhacañcalamattamadhuvratalocanike ;
maṇigaṇakuṇḍalalolaparisphuradākulagaṇḍayugāmalake
jaya yamune jaya bhītinivāriṇi saṅkaṭanāśini pāvaya mām .7.

कलरवनूपुरहेममयाचितपादसरोरुहसारुणिके
धिमिधिमिधिमिधिमितालविनोदितमानसमञ्जुलपादगते ।
तव पदपङ्कजमाश्रितमानवचित्तसदाखिलतापहरे
जय यमुने जय भीतिनिवारिणि सङ्कटनाशिनि पावय माम् ॥८॥

kalaravanūpurahemamayācitapādasaroruhasāruṇike
dhimidhimidhimidhimitālavinoditamānasamañjulapādagate ;
tava padapaṅkajamāśritamānavacittasadākhilatāpahare
jaya yamune jaya bhītinivāriṇi saṅkaṭanāśini pāvaya mām .8.

भवोत्तापाम्भोधौ निपतितजनो दुर्गतियुतो
यदि स्तौति प्रातः प्रतिदिनमनन्याश्रयतया ।
हयाह्रेषैः कामं करकुसुमपुञ्जै रविसुतां
सदा भोक्ता भोगान्मरणसमये याति हरिताम् ॥ ९ ॥

bhavottāpāmbhodhau nipatitajano durgatiyuto
yadi stauti prātaḥ pratidinamananyāśrayatayā ;
hayāhreṣaiḥ kāmaṃ karakusumapuñjai ravisutāṃ
sadā bhoktā bhogānmaraṇasamaye yāti haritām . 9 .