षडाधारपङ्केरुहान्तर्विराज-
त्सुषुम्नान्तरालेऽतितेजोलसन्तीम् ।
सुधामण्डलं द्रावयन्तीं पिबन्तीं
सुधामूर्तिमीडे चिदानन्दरूपाम् ॥ १ ॥

ṣaḍādhārapaṅkeruhāntarvirāja-
tsuṣumnāntarāle’titejolasantīm ;
sudhāmaṇḍalaṃ drāvayantīṃ pibantīṃ
sudhāmūrtimīḍe cidānandarūpām . 1 .

ज्वलत्कोटिबालार्कभासारुणाङ्गीं
सलावण्यशृङ्गारशोभाभिरामाम् ।
महापद्मकिञ्जल्कमध्ये विराज-
त्त्रिकोणे निषण्णां भजे श्रीभवानीम् ॥ २ ॥

jvalatkoṭibālārkabhāsāruṇāṅgīṃ
salāvaṇyaśṛṅgāraśobhābhirāmām ;
mahāpadmakiñjalkamadhye virāja-
ttrikoṇe niṣaṇṇāṃ bhaje śrībhavānīm . 2 .

क्वणत्किङ्किणीनूपुरोद्भासिरत्न-
प्रभालीढलाक्षार्द्रपादाब्जयुग्मम् ।
अजेशाच्युताद्यैः सुरैः सेव्यमानं
महादेवि मन्मूर्ध्नि ते भावयामि ॥ ३ ॥

kvaṇatkiṅkiṇīnūpurodbhāsiratna-
prabhālīḍhalākṣārdrapādābjayugmam ;
ajeśācyutādyaiḥ suraiḥ sevyamānaṃ
mahādevi manmūrdhni te bhāvayāmi . 3 .

सुशोणाम्बराबद्धनीवीविराज-
न्महारत्नकाञ्चीकलापं नितम्बम् ।
स्फुरद्दक्षिणावर्तनाभिं च तिस्रो
वलीरम्ब ते रोमराजिं भजेऽहम् ॥ ४ ॥

suśoṇāmbarābaddhanīvīvirāja-
nmahāratnakāñcīkalāpaṃ nitambam ;
sphuraddakṣiṇāvartanābhiṃ ca tisro
valīramba te romarājiṃ bhaje’ham . 4 .

लसद्वृत्तमुत्तुङ्गमाणिक्यकुम्भो-
पमश्रि स्तनद्वन्द्वमम्बाम्बुजाक्षि ।
भजे दुग्धपूर्णाभिरामं तवेदं
महाहारदीप्तं सदा प्रस्नुतास्यम् ॥ ५ ॥

lasadvṛttamuttuṅgamāṇikyakumbho-
pamaśri stanadvandvamambāmbujākṣi ;
bhaje dugdhapūrṇābhirāmaṃ tavedaṃ
mahāhāradīptaṃ sadā prasnutāsyam . 5 .

शिरीषप्रसूनोल्लसद्बाहुदण्डै-
र्ज्वलद्बाणकोदण्डपाशाङ्कुशैश्च ।
चलत्कङ्कणोदारकेयूरभूषो-
ज्ज्वलद्भिर्लसन्तीं भजे श्रीभवानीम् ॥ ६ ॥

śirīṣaprasūnollasadbāhudaṇḍai-
rjvaladbāṇakodaṇḍapāśāṅkuśaiśca ;
calatkaṅkaṇodārakeyūrabhūṣo-
jjvaladbhirlasantīṃ bhaje śrībhavānīm . 6 .

शरत्पूर्णचन्द्रप्रभापूर्णबिम्बा –
धरस्मेरवक्त्रारविन्दां सुशान्ताम् ।
सुरत्नावलीहारताटङ्कशोभां
महासुप्रसन्नां भजे श्रीभवानीम् ॥ ७ ॥

śaratpūrṇacandraprabhāpūrṇabimbā –
dharasmeravaktrāravindāṃ suśāntām ;
suratnāvalīhāratāṭaṅkaśobhāṃ
mahāsuprasannāṃ bhaje śrībhavānīm . 7 .

सुनासापुटं सुन्दरभ्रूललाटं
तवौष्ठश्रियं दानदक्षं कटाक्षम् ।
ललाटो लसद्गन्धकस्तूरिभूषं
स्फुरच्छ्रीमुखाम्भोजमीडेऽहमम्ब ॥ ८ ॥

sunāsāpuṭaṃ sundarabhrūlalāṭaṃ
tavauṣṭhaśriyaṃ dānadakṣaṃ kaṭākṣam ;
lalāṭo lasadgandhakastūribhūṣaṃ
sphuracchrīmukhāmbhojamīḍe’hamamba . 8 .

चलत्कुन्तलान्तर्भ्रमद्भृङ्गवृन्दं
घनस्निग्धधम्मिल्लभूषोज्ज्वलं ते ।
स्फुरन्मौलिमाणिक्यबद्धेन्दुरेखा-
विलासोल्लसद्दिव्यमूर्धानमीडे ॥ ९ ॥

calatkuntalāntarbhramadbhṛṅgavṛndaṃ
ghanasnigdhadhammillabhūṣojjvalaṃ te ;
sphuranmaulimāṇikyabaddhendurekhā-
vilāsollasaddivyamūrdhānamīḍe . 9 .

इति श्रीभवानि स्वरूपं तवेदं
प्रपञ्चात्परं चातिसूक्ष्मं प्रसन्नम् ।
स्फुरत्वम्ब डिम्बस्य मे हृत्सरोजे
सदा वाङ्मयं सर्वतेजोमयं च ॥ १० ॥

iti śrībhavāni svarūpaṃ tavedaṃ
prapañcātparaṃ cātisūkṣmaṃ prasannam ;
sphuratvamba ḍimbasya me hṛtsaroje
sadā vāṅmayaṃ sarvatejomayaṃ ca . 10 .

गणेशाभिमुख्याखिलैः शक्तिबृन्दै-
र्वृतां वै स्फुरच्चक्रराजोल्लसन्तीम् ।
परां राजराजेश्वरि त्रैपुरि त्वां
शिवाङ्कोपरिस्थां शिवां भावयामि ॥ ११ ॥

gaṇeśābhimukhyākhilaiḥ śaktibṛndai-
rvṛtāṃ vai sphuraccakrarājollasantīm ;
parāṃ rājarājeśvari traipuri tvāṃ
śivāṅkoparisthāṃ śivāṃ bhāvayāmi . 11 .

त्वमर्कस्त्वमिन्दुस्त्वमग्निस्त्वमाप-
स्त्वमाकाशभूवायवस्त्वं महत्त्वम् ।
त्वदन्यो न कश्चित्प्रपञ्चोऽस्ति सर्वं
त्वमानन्दसंवित्स्वरूपां भजेऽहम् ॥ १२ ॥

tvamarkastvamindustvamagnistvamāpa-
stvamākāśabhūvāyavastvaṃ mahattvam ;
tvadanyo na kaścitprapañco’sti sarvaṃ
tvamānandasaṃvitsvarūpāṃ bhaje’ham . 12 .

श्रुतीनामगम्ये सुवेदागमज्ञा
महिम्नो न जानन्ति पारं तवाम्ब ।
स्तुतिं कर्तुमिच्छामि ते त्वं भवानि
क्षमस्वेदमत्र प्रमुग्धः किलाहम् ॥ १३ ॥

śrutīnāmagamye suvedāgamajñā
mahimno na jānanti pāraṃ tavāmba ;
stutiṃ kartumicchāmi te tvaṃ bhavāni
kṣamasvedamatra pramugdhaḥ kilāham . 13 .

गुरुस्त्वं शिवस्त्वं च शक्तिस्त्वमेव
त्वमेवासि माता पिता च त्वमेव ।
त्वमेवासि विद्या त्वमेवासि बन्धु-
र्गतिर्मे मतिर्देवि सर्वं त्वमेव ॥ १४ ॥

gurustvaṃ śivastvaṃ ca śaktistvameva
tvamevāsi mātā pitā ca tvameva ;
tvamevāsi vidyā tvamevāsi bandhu-
rgatirme matirdevi sarvaṃ tvameva . 14 .

शरण्ये वरेण्ये सुकारुण्यमूर्ते
हिरण्योदराद्यैरगण्ये सुपुण्ये ।
भवारण्यभीतेश्च मां पाहि भद्रे
नमस्ते नमस्ते नमस्ते भवानि ॥ १५ ॥

śaraṇye vareṇye sukāruṇyamūrte
hiraṇyodarādyairagaṇye supuṇye ;
bhavāraṇyabhīteśca māṃ pāhi bhadre
namaste namaste namaste bhavāni . 15 .

इतीमां महच्छ्रीभवानीभुजङ्ग-
स्तुतिं यः पठेद्भक्तियुक्तश्च तस्मै ।
स्वकीयं पदं शाश्वतं वेदसारं
श्रियं चाष्टसिद्धिं भवानी ददाति ॥ १६ ॥

itīmāṃ mahacchrībhavānībhujaṅga-
stutiṃ yaḥ paṭhedbhaktiyuktaśca tasmai ;
svakīyaṃ padaṃ śāśvataṃ vedasāraṃ
śriyaṃ cāṣṭasiddhiṃ bhavānī dadāti . 16 .

भवानी भवानी भवानी त्रिवार-
मुदारं मुदा सर्वदा ये जपन्ति ।
न शोको न मोहो न पापं न भीतिः
कदाचित्कथञ्चित्कुतश्चिज्जनानाम् ॥ १७ ॥

bhavānī bhavānī bhavānī trivāra-
mudāraṃ mudā sarvadā ye japanti ;
na śoko na moho na pāpaṃ na bhītiḥ
kadācitkathañcitkutaścijjanānām . 17 .